مسلسل بطولة اعضاء منتدى ستارز

بيس يا معلم
يابن بلدي

قشطه يا عمو
انا عاوز اعرف ايه الى حصل وعيشنا

الحلقة الخامسة

المشهد الاول : على باب الفيلا

طاهر و سمبو رجعوا
و معاهم : علا و ريم و زهرة

طاهر : احنا رجعنا يا خلق

الليثى : اهلان بيكم ادخلوا بسرعة

سمبو : اية حد مات ؟؟

الليثى : مات اية بس
ابوشادى عامل تجمع جوا

دخول على السفرة
فى بداية السفرة ابوشادى

و الاعضاء حول السفرة

دخلوا المجموعة

ابوشادى : كويس انكم جيتم اتفضلوا اقعدوا

سمبو : باتو فين ؟؟

ماكس : ذهب و لم يعد
ههههههههههههه

حسن : تلقيه تاه

ابوشادى : هنستناه منعرفش اية الى حصلهم

ريم : هوا راح فين و حصلهم ؟؟ هوا فية حد معاه ؟؟

السرس : ايوة الشرقاوى معاه

طارق : و راحوا يجيبوا هبة

علا : هبة هتيجى هنا ؟؟

ابوشادى : اكيد المنتدى كلة هيكون هنا

علا : طب كويس والله

طاهر : اومال اية التجمع دا ؟؟

ابوشادى : دا عشان التعليمات

سمبو : شكلنا كدا دخلنا الجيش !!
هههههههههه

ابوشادى : بس ولا نفس
و كمان كلمنا اهاليكوا
و انا الى همسك مصروفكم
الى اهاليكوا هيبعتوهملكوا

طاهر : نعم نعم ؟؟
هوا عبط

ابوشادى : هوا كدا مش عاجبك اتصل باهلك
انا والليثى اكبر هنمسك مسؤليتكم

هيما : خلاص بقى يا عم طاهر

طرق الباب و اسرع طارق لفتح الباب

طارق : باتووو
شرقاوى
و هبة اهلان يا شلة

ادخلوا بسرعة ابوشادى دماغوا لسعت و بيدينا محاضرة

ابوشادى يصرخ : سمعتك ياااااااااااض

المهم دخلوا قاعة السفرة

بارتيز : اية ؟؟
انتوا بتحطوا خطة الهجوم على اسرائيل اية القعدة دى

ابوشادى : اسكت و قعد
ازيك يا هبة ؟؟
الرحلة كانت كويسة ؟؟

هبة : الحمدلله
الرحلة كانت حلوة
لحد ما واحد بوظها
و حرقلى دمى

ابوشادى : اكيد انت يا بارتيز

بارتيز : بارتيز مالوا بس
دا غلط غير مقصود

الشرقاوى : خلاص بقى
و شوف انتا كنت جامع الناس لية

بارتيز ادخل و قال : اومال فين ظاظا ؟؟

ابوشادى : ظاظا راح يجيب العضوة ( ملاك حزين )

سمبو : الله ؟ هيا ملاك كمان هتكون هنا

ابوشادى : مش انا قولت المنتدى كلة هنا

و بعد شوية دخل ظاظا و معاه ملاك

وبدا التعارف بين البنات و الولاد

___________________________

ابو شادى : احم احم
ممكن الكلام يقف و تخلونى اقول الى عندى

ماكس : اتفضل يا زعيم

ملاك : اتفضل قول

بارتيز : خلص و نبى

طاهر : قصر ها
دى مش خطبة الجمعة

ابوشادى : لم نفسك منك لة
و اسمعوا

1 - ممنوع اقتراب الاولاد من غرفة البنات
الا و احنا كلنا صحيين و بحدود
و نفس شيئ للبنات

2 - بالنسبة للجنينة محدش يبوظ الزرع و لا يخصر حاجة

3 - بالنسبة للبيت محدش يكسر و مفيش لعب كورة جوا

4 - محدش يبعد عن البيت و لا يقرب من المقبرة الى جنب البيت

حسن اتش : اشطة اوى فية مقبرة كمان

علا : مقبرة كدا من اولها

الليثى : قولوا حاضر و خلاص

بارتيز : طب اهى موجودة عشان لو حد مات او ناوى يموت

ماكس : اه يا فقرى

طارق : بس يا ولا عشان محدش يقلق

ابوشادى : الكلام مفهوم
دلوقتى نطلع نرتب الغرفتين

البنات غرفتهم على الشمال

و الولاد على اليمين

_________________

البنات طلعوا غرفتهم
و فيها 6 سراير
3 شفونيرات
6 دواليب

وسط فرحة البنات الــ5 بالغرفة الكبيرة

هبة : الله الروم كبيرة و حلوة اوى

علا : انا هاخد سريرين ليا لوحدى

زهرة : هههههههه
لا السرير الزيادة كل واحدة تخدوا يوم

ضحكوا البنات و بدأت كل واحدة ترتب حاجتها فى دولبها
و الدولاب الزيادة للعاب و الزيادات

_____________________

اما الحال فى غرفة الاولاد

فيها 5 سراير
و شيفونيراه واحدة
و دولابين

هيما : اية يا عم الهبل دا ؟؟

السفرى : يا لهوى على العبط 5 سراير على 15 شخص

طاهر : دا احنا ابوشادى , السرس , طاهر , هيما , سمبو , طارق , الشرقاوى , السفرى , على , بارتيز , ظاظا , حسن , ماكس , جهاد, الليثى

ابوشادى : طارق روح شوف غرفة البنات عاملة ازاى

طارق راح و شاف و رجع

طارق : دول عندهم سرير و دولاب زيادة

السرس : طب حد يروح يقولهم هاتوا السرير الزيادة دا

بارتيز : انا هروح

و اتجهة بارتيز لغرفة البنات

______________

فاصل قصير جدا و نواصل

( الفواصل يعنى هكمل فى نفس الوقت بسسب مساحة التوبيك )

بيس

حلوة اوي الحلقه كملها احنا رزقنا واسع يابنات اهو

عدنا

تقدم بارتيز بخطواط ثابتة و ترك باب غرفة البنات

فتحت هبة الباب

هبة : هوا انت عايز اية ؟؟

بارتيز : عايز السرير الاضافى الى عندكوا

هبة : معندناش سراير و دا مش زيادة
احنا محتاجينة

بارتيز : محتاجينة فى اية انتوا خمسة بس

هبة : ملكش دعوى مش هتاخدة

بارتيز : لا هاخدوا بالزوق ولا بالعافية

هبة : عافية اية؟؟
انت ليك عين تتكلم اصلا

بارتيز : بس متعصبنينيش

هبة : يعنى هتعملى اية ؟؟
روح راوح على رومك يا شاطر

و قفلت الباب فى وش بارتيز

رجع بارتيز للاوضة

وسط ضحك الكل

طاهر : ههههههههههههههههههههههههههههههههههههههههههههههههههههههههههه

ماكس : يخرب بيت شكلك ههههههههههههههههههههههههههههههههههههههههههههههههه

سفرى : مش قادر انسى منظرك هههههههههههههههههههههههههههههههههههههههههه

ابوشادى : هههههههههههههههههههههههههههههههههههههههههه مش قادر ابطل ضحك

بارتيز : حتى انت يا كبير ؟؟ ماشى
حد تانى يروح طيب

طارق : يروح فين انت مجنون

الشرقاوى : ودوا حسن

حسن : لا يا عم والله ما اروح

بارتيز : خلاص ناموا كل 3 على سرير

ابوشادى : بلاش هبل كل 2 على سرير و 5 على الارض
كل الى بيدخنوا على الارض
جنب الشباك

الى هما : السفرى و هيما و السرس و حسن و ماكس

و كل اتنين على سرير اخلصوا

بارتيز : انا و الشرقاوى

ابوشادى : طيب انا و الليثى

على : انا و طاهر

سمبو : انا و طارق اخويا

ابوشادى : خلاص يبقى ظاظا و جهاد

كدا تمام ؟؟

كل وافق لان مفيش حل تانى

______________________

الوضع عند البنات كل واحدة على سرير كبير لواحدها

و صوت الضحك واصل لاخر الفلا

____________________

بارتيز فى صوت نعسان : سفرى انت بتعمل اية ؟؟

هيما : بنلف ياض

الشرقاوى : بتلفوا اية ؟

السرس : حشيش طبعا

بارتيز : يا نهار ابوك اسود
حشيش ؟ جايب معاك حشيش

السفرى : بس الناس نايمة وطى صوتك

حسن : انزل ياض

ماكس : خد يا معلم سمسون و ادعيلى

بارتيز : بلاش هبل انت و هوا و اطفوا الهبل دا
و ناموا يا ولاد العــ...............

الشرقاوى : تصبحوا على خير

_____________________________

و نام الكل فى اول ليلة لهم فى البيت
حتى من غير عشا لكتر التعب

و طبعا فية فرق كبير بين اوضة الولاد و البنات

الى متى ستظل هذا المعاناه

و ماذا سيحدث بين بارتيز و هبة ؟؟

تابعوا الحلقة القادمة

تسلم دماغك دي
والله الحوار مشيق وعاجبني اوي
وان شاء الله تعدي الخناقة بينك وبين هبه علي خير
ههههههههههههههههههههههههههههههههه

هههههههههههههههههههههههههههههههه...
اي الشر ده كله ....
المسلسل فن والله ...
يلا كمل عشان اعرف ايه الي حصل ..

قشطه عليك وربنا يخليك لمصر

انا عندي اعترااااااااااااااض
انا حر في مصروفي وابويا عمره مايحط مصروفي بين ايد حد عشا واثق في اني مش هشتري بيه حاجة غير الحشيش
هههههههههههههههههههههههههه
بهزر
بس انا المفروض انام على السرير ولوحدي كمان
اولا عشان بطلت سجاير
تانيا عشان الحالة المرضية الخاصة.......
تالتا عشان انا اكبركم جسما وعقلا :study: bleh

هههههههههههههههههههههه

جسما اه

انما عقلا لا

ههههههههههههههههههه

و شكرا يا بارتيز عالتوبيك جامد و الله

تحياتي........

فعلا جسما فقط
لكن عقلا لأ طبعا

ويابارتيز ماتزعلهوش واديله
سرير لوحده عشان مايكلناش
ههههههههههههههههههههههههه

لا طبعا

دا هينام على الارض

ايوة الارض دي للمحششين وكبار الجسم فقط

هيهيهيييييييييييييييييي

لاحو ولا قوة إلا بالله ملقتوش غير جهاد معايا

ازيك يا بارتيز كان يوم حلو

كمل وربنا معاك

هههههههههههههههههه

يا حبيبى
ربنا معاك يا حسن
كمل يا باتو
والا ضربتك بدبوس
متصحاش منه
هههههههههههههههه

ايوه كده يا برتيز
ده الشغل
كمل يا عمو برتيز

فين حلقة النهارده؟

الحلقة مش حيكتبها
لأنه مشغول

طب هيكتب الحلقه امتي؟
دا كده عدى يوم عليها

تلاقي نايم ولا مش عاوز يعملها

ممكن بس يارب ماتطولش يابارتيز
ياجامد عشان المسلسل شيق كييك

صح والله
يلا يا برتيز عايزين شغلك

ايه ياعم بارتيز الغيبه طولت اوي
دا انت طولت اوي

لو تعبان ابقي طمنا عليك والف سلامة يابن بلدي وماتطولش

انا كويس يا رجالة

بس كان عندى شوية ظروف

و بإذن الله هحط الحلقة اهوا بسرعة

الحلقة السادسة

المشهد الاول : غرفة الشباب

صحى ابوشادى فى الصباح الباكر

ابوشادى : صباح الخير

الليثى : صباح الورد يا حبوب

ابوشادى : حد صاحى ؟؟؟

الشرقاوى : ايوة انا صاحى

ابوشادى : طب قوموا نصلى
و بعدين شرقاوى انت المسؤل عن الشباب
لانى رايح مشوار و جاى

الليثى : رايح فين ؟؟

ابوشادى : اتمشى شوية

الليثى : انا جاى معاك

نزلوا عملوا فطارهم و خرجهم

صحى طاهر و السرس و السفرى و ماكس و بارتيز

و نزلوا على المصبخ

السفرى : انا جعان يا رجالة

ماكس : اعملك اى حاجة تكلها

السفرى : بارتيز و نبى اعملى حاجة معاك

بارتيز : و انا مال اهلى
متعمل لنفسك

طاهر : يا جدعان فى الجبنة البيضة

ماكس : جبنة على الصبح يا معفن
فين البيض

بارتيز : يخرب بيت القرف عالصبح الجبنة ارحم

السفرى : طب فين السكينة نقطع العيش ؟؟

بارتيز : و هوا فين العيش دا اصلا ؟؟

_______________________

و بدأ الصوت يعلى بين الشباب الجعانة دول

و ازعج البنات و صحيوا البنات

___________

بارتيز : بس بس انتا و هوا

احنا نطلب ديلفرى

السفرى : احبك و احب افكارك

ماكس : هتجيب اية ؟؟
انت طول عمرك شديد

بارتيز : فول و طعمية

طاهر : يا عم الله يخليك بقى

بارتيز : اية عايزين كبدة ؟؟

السفرى : بس بس عشان مرجعش عليك
الفول تمام و طعمية كدا الحمدلله

راحوا شوية الشباب و طلبوا و فول و طعمية
و كلهوم بالف هنا

_________________

البنات صحيوا
و راحوا المطبخ مفيش دقيقتين

طالعين و عاملين احلى فطار

شفهوم الولاد بالستعجاب

السفرى : لا حول ولا قوة الا بالله
مش الاكل دا مكنش موجود ؟؟

ملاك : لا كان موجود

بنت النيل : لو كنت دورت علية كنت هتلاقية

ماكس : يا جدعان مالاخر احنا ملناش فى اى حاجة

السرس : يا جدعان تعالوا نطلع نلعب كورة برة

طاهر : بيس يا مان

بارتيز : لا روحوا انتوا انا طالع الاوضة

السرس : ابقا تعالا بعد ما تصحى
هههههههههههههههههههه

خرجوا العيال
و بارتيز راح الاوضة عشان يصحى بقية ناس

صحوا ونزلوا

بارتيز قاعد فى الاوضة بيعزف و يغينى

بارتيز : سرحت فييييييك و نسيت حبيبى الدنيا و انا قدام عنيك
قرب كمان دنا من زمان مستنى تلمسنى بايديك
يآآآآآآآآآآآآآآآآآآآآه دكأن اول مرة احس براحة
معآآآآآآآآآآآآآآك

و فأجاة صوت من غرفة البنات

بس الدوشة دى !!!

بارتيز : مين الى بينادى

طلعت لولا و بنت النيل

راحوا لة

لولا : بطل الازعاج دا

بنت النيل : ممكن تهدى شوية
صوتك عامل زى الى دايس علية قطر

بارتيز وشة جاب اللوان

بارتيز : طب سمعتى العزف

بنت النيل : لا مخدش بالى
و ميهيمنيش

بارتيز : طب اطلعى من هنا بالزوق

ولولا : نعم نعم !!
انت بتكلم مين

بارتيز : بكلمكم انتم

_______________

خارج المنزل

طاهر و السرس بيلعبوا بالكورة على نار

ماكس و ظاظا قاعدين بيكلموا

و فأجاة كورة صاروخية من السرس
فى وش ماكس

ماكس وشة اتبق

ماكس : انت احول يلا ؟؟

السرس : مش انتا شايف انى بلعب

ماكس : يبقى خد بالك عشان متضربش

السرس : تضرب ميــــ.....

لسة مكملش الكلمة و سمعوا صوت بارتيز

بارتيز : الحقوووووووووووووووووووونيييييييييييييييييييي

بصوا لقوا بارتيز بيجرى و وراه لولا و بنت النيل

لحد ما خرج برا باب الفلا

و بنت النيل و لولا طلعوا تانى الاوضة

السرس : مالك يا ابنى

بارتيز : الاتنين دول اجننوا رسمى كانوا هيضربونى !!

ماكس : اه يا خرع

بارتيز : بس بس انتا مشفتش شكلها
و اخدت جيتارى واااااااااء

طاهر : يا عم هلس
و اللعب معانا

و وسط اللعب كورة انطلقت
من طاهر فى زجاج الشباك بتاع البنات
و اكيد كسر حاجة جوا

نزلوا البنات و عنيهم بطق شرار

طاهر فى خوف : و انبى ما تيجوا جنبى

السرس : والله منا

ماكس : مش انا

بارتيز فى رعب : اية اية انا مالى
والله ما انا

زهرة : اومال مين الهوا

بارتيز : ايوة هوا الهوا

بنت النيل : والله يا ظريف ؟
بلاش خفة

لولا : واحد من الى بيلعبوا كورة
يا طاهر يا السرس

طاهر : طاهر اية لا
لا و نبى محد يضرب
طب انا ماشى بس محدش يضرب

لولا : ابقى قابلنى لو شفت الكورة تانى

و رجعنوا على اوضتهم
___________________

بارتيز : شوفوتوا ؟؟
هههههههههههههههههه

طاهر : اية دا يا عم انا خفت

السرس : دول وقت الفرح كويسين
لكن لو اضايقوا ممكن يرتكبوا جناية

و راحو البنات على الاوضة بعد ان اخفوا كورة طاهر
و جيتار بارتيز

______________________

فاصل قصير و نواصل

و نترككم مع بعض الاعلانات

زى بيسبى و سفن و الهم دا

يلا مستنيينك علي نار

عدنا

نادا محمد الشرقاوى على البنات عشان تنزل تحضر الغداء

و الشباب ييجوا بوضبوا السفرة

_______________________

المشهد الاول : فى المطبخ

المطبخ كبير عامل زى المصنع اوى و البنات رايحين حايين فية
و ريم رابطة راسها بالاشارب و عمالة تزعق

ريم : يلا يا بنات عايزين نخلص الاكل سرعة

بنت النيل : مستعجلة على اية لسة كتير على الغدا

زهرة : يا جماعة اللحمة تقريبا مش هتكفى نعمل اية ؟؟

بنت النيل : قولى للولا هى هتتصرف تجبلك شوية من اللحمة المعفنة
الى لقينهاها بتاعة السنة الى فاتت

ملاك : يلا يا بنت النيل دى قضية شائكة
هل ممكن باكل اللحم المعفن بعد ما عفن بشوية ؟؟

بنت النيل : مش مهم حبة بوهارات و تبقى العملية فى النميلة
و بعدين دول طيران بالكلوا الزلط

زهرة : حرام عليكى يا بنت النيل ناكلهم لحمة معفن
اومال ناكل كلاب الحارسة الى برة اية ؟؟

لولا : و احنا هناكل معاهم اللحمة دى ؟؟ يااااى

ملاك : لحمة اية يا شابة منك ليها هوا اكلنا دا يصلح للاستهلاك الادمى ؟؟
انا طالبة دليفرى من عند كودو

لولا : يا بنات انتوا خلصتوا حلة الملوخية ؟؟

زهرة : ايوة خلصناها بس عايزين حد يشوفلنا الملح مزبوط ولا لا ؟

بنت النيل : عايزين نشوف الملح مظبوط ولا لا
حد يطوع و يدوق يا بنات

حصل هرج و مرج و بنات جريت فى كل مكان

ملاك : اية يا بنات دا عمل بطولى و شرف عظيم للى هدوق و الى هيقوم بالعملية
البطولية هانديلة ميدالية شوكة البتنجان

ريم : ازاى بس واحنا الى طبخين ندوق ازاى ؟؟

ملاك : متخفيش انتى هدوقى من طرف لسانك مش هتبلعى حاجة

بنوتة : احنا معندناش الا لسان واحد و بعدين العملية دى عايزة واحد استشهادية

ريم و عينيها بتبرق : ايون هى الاستشهادية هيا لولا

لولا : لا انا عندى افجر نفسى ولا اموت بالملوخية

ملاك : يا بنتى انتى هدوقى بس بغد الغدا الى تاكلى الملخوية هتنفجرى لوحدك

بنوتة : خلاص لا ندوق ولا حاجة هيا كدة عاجبهم عاجبهم
مش عاجبهم يجيبوا دليفرى

يلا يا بنات نحط الاكل على السفرة

_________________________

المشهد التانى : على السفرة

المكان : حجرة الطعام و كل الاعضاء قاعدين على السفرة
و الشرقاوى على رأس السفرة

الشرقاوى : كل سنة وجميع اعضاء المنتدي بخير وبصحة بالسلامة
واللي معندهاش ربنا يرزقها واللي لسه متجوزتش ان شا الله عنها ماتجوزت
وخليها كدة لحد ما تعنس واللي ناوية تتجوز تاخد بالها لان الجواز هباب وزفت ..

البنات في صوت واحد : وانت طيب يا شرقاوى وربنا يخليك لينا يارب ..

الشرقاوى : وانتم طيبين يابنات و كل سنة واعضاء المنتدي بخير وسعادة وجمال
و الشباب اللي بتدلع تبطل دلع
واللي عايزين يتجوزا بقولهم يعرفوا يعني ايه مسئولية الاول
واللي مش عايزين ان شا الله برضه عنهم ماعازوا وخليهم كدة لحد ما يموتوا لوحديهم
والا عيل ولاتيل ياخد باله منهم واللي بيقعدوا علي القهوة يبطلوا يقعدوا
واللي مبيقعدوش ان شا الله عنهم ماقعدوا ..

الولاد في صوت واحد : وانت طيب يا شرقاوى وربنا يخليك لينا ..

________________________

الشرقاوى : وانتم طيبين ياولاد حد جعان يقول( وهو يرمقهم بنظرة نارية ..)

كل اعضاء المنتدي في خوف : لا طبعا جوع ايه احنا اخر حاجة نفكر فيها الاكل
..( يقولوها وهم ينظرون للاكل بحسرة ..)

الشرقاوى في رضا : طيب كويس ولحد لما تجوعوا أوى هأقولكوا درس صغير

يحدث هرج ومرج وهمهمة في القاعة .

الشرقاوى بيبرق ليهم وبيضرب بايده علي الترابيزة : بس سكوت مش عايز اسمع نفس .

طاهر : فيه ايه ياحاج انت واخد الموضوع علي صدرك كدة ليه
يعني ايه متسمعش ولا نفس مش حانتنفس يعني والا ايه
هو انت فاكرنا هنعود حاندفن ومش نتنفس ..

بارتيز : ماهو يا شرقاوى لو انت كنت ناوي تقولنا درس كنت عملت حسابك انبارح وقولتهولنا قبل ما ننام كان يادوبك لحقت تخلصه علي الغدا

الشرقاوى : بس ياض منك ليه وانت يابو شعر ولسان طويل انا حاعلمك تتكلم كويس ظاظا هاتلي مقص الجنايني

ظاظا : حمامة اجيب الفلكة كمان ؟؟ (اصله بيموت فى المصايب وعايز ينتقم من بارتيز)

بارتيز : خلاص ياشرقاوى انا بهزر حقك عليا ..

الشرقاوى : وانت ياعم طارق ايه بس ..

طارق : لا ولاحاجة ياحاج ده انت كلامك علي قلبنا زي العسل
بس والنبي اختصر علشان نلحق صلاة الفجر ..

الشرقاوى : لا متخفش انا كمان عايز اصلي العشاء ..

ريم : ياشرقاوى أنا جعانة وانا بقول ناجل الدرس لبعد الغدا ..

زهرة : لا انا عايزة اشوف الماتشات ..( ماتشات ايه ! ! )

الشرقاوى : مفيش تاجيل ولا حاجة انا حاقول كلمتين كدة وخلاص ..

بسم الله الرحمن الرحيم الحمد لله الذي هدانا وماكنا نهتدي لولا هدانا الله اما بعد ...

الشرقاوى : يتكلم...

حان الآن آذان المغرب حسب التوقيت المحلى لمدينة القاهرة

الشرقاوى مازال يتكلم ..

حان الآن آذان المغرب حسب توقيت مدينة بروكسيل

الشرقاوى مازال يتكلم ..

لولا..انهارت وحاول كل من بارتيز و طاهر مساعدتها
ولكن زغرة من الشرقاوى رجعتهم لمكانهم ..

الشرقاوى مازال يتكلم ..

بنوتة بتاكل في صوابعها و الشرقاوى مازال يتكلم ..

انفجرت مرارة سمبو

و الشرقاوى مازال يتكلم ..

دقت الساعة الثانية عشر وحان الان موجز الانباء

والشرقاوى مازال يتكلم ..

حسن عمال يدور علي شعرة في راسه علشان يشدها

و الشرقاوى مازال يتكلم ..

حان الان موجز انباء الساعة الثانية ..

زلزال يدق اليابان ومصرع عشرين الف شخص ..

الشرقاوى مازال يتكلم ..

خبر عاجل .. تغيير حكومة نظيف وتعيين حكومة ابو الليف ..

الشرقاوى مازال يتكلم ..

مصرع مسئول كبير بالحكومة ضربا بالقباقيب ..

يصمت الشرقاوى....... تتصاعد تنهدات الارتياح ..

الشرقاوى : انا تعبت حانقف شوية ....

ملاك في لهفة: ايه خلاص ..

الشرقاوى : لا بس حانقف دقيقة حداد علي روح المرحوم ونقرأ الفاتحة ..

الاحباط علي وجه الجميع ..

و الشرقاوى عاد وتكلم ..

وتكلم ...

وتكلم........

وتكلم............

خبر عاجل انفجار ماسورة الغاز الرئيسية بالعاصمة ..

الشرقاوى مازال يتكلم ..

الشرقاوى : بس وفي نهاية الدرس تتعلموا من كلامي ده ان خير الكلام ماقل ودل
يعني البنات اللي بترغي تبطل رغي والشباب اللي بيلك يبطل لك ..

تنطلق صرخة من اخر الترابيزة ويصمت الجميع ..

ياتري ايه اللي حصل ؟؟؟
مين اللي اتجرأ وصرخ ؟؟
وياتري الاكل كان ايه علي الغدا ؟؟
وايه رأي الناس فيه ؟؟

خليكم معانا الحلقة الجاية علشان تعرفوا .,,,,,,

قشطة اوي يابارتيز ياجامد
عفارم عليك يابن بلدي

وياريت ماتطولش

اي نعم انا بحب اتكلم وادي محضرات ودروس

لكن مش ده كله

يلا مش مشكلة

اهم حاجة تكونوا استفدتوا من الدرس

وخير الكلام ما قل ودل

ههههههههههههه

لا ياض اوعى تفكر كدا

انا مش بكلم عنك

ولا تفهمنى غلط

دا تبع الحوار بتاع المسلسل اوعتى تزعل منى

و لو ضايققك والله العظيم

لمسحة حالا

انت هاتنزل الحلقه الجاية امتي ؟

جميل
وتسلم ايديك
عاوز اثاره يا باتو

حلوة الحلقه يابرتيز بس مالك مطلعنا شريرين كدا ليه
بس احنا حلوين اوي وعندنا كرم اخلاق وقفنا في المطبخ وعملنا غدا ههههههههههههههه
حلوة الحلقه يلا كملها

هههههههههههههههههه

روعة ياباتو

بس انا قولتلك اييه في الرسالة الخاصة ؟؟ !!!

ههههههههههههه

حلوه اوي يا بارتيز

يلا كمل يا باشا

ربنا معاك كمل

مش وحش
كمل
عسى ان يكون هناك افضل
مشكور

نعم نعم يا اخ حسن عسى عسى ! ! ! !

لا والله مش زعلان ولا حاجة

كمل والله انا دحكت دحك

كمل ربنا معاك

لا انا زعلان

بقى البنات ينزلو يمسخرونا

خ خ خ خ خ خ خ

بصراحة جامدة مووووووت بدال ما عنك كدة تأليف سيناريوهات كدة شد حيلك ونشوفك في التلفزيون هههههههههههه

انا مستنية الحلقة الجاية واقيم الشخصية اللي انت حططي فيها لانها مش شخصيتي الحقيقية

يا جماعة

انا الضغط عليا كتر

و احب انبه

الاعضاء ان انا مش قصدى احت كل واحد فى شخصيتة الحقيقة

انا مألف سيناريو و حوار

و بركبة على الشخصية بالاسم بس

و انا معرفش شخصيات ناس كتير زى البنات

يعنى ارجوا الانتباه انها مجرد تمثيل

و تأليف

و شكرا

الحلقة السابعة

الشرقاوى : مين اللي صرخ ؟؟؟

السفرى : مش انا والله ..
دة جهاد اللي صرخ ..

كل العيون تتجه نحوة

و الشرقاوى ينظر له شذرا : مين جهاد

ظاظا يميل علي اذن الشرقاوى ويهمس : ده واحد معانا هنا ..

الشرقاوى : قوم يادوك كدة وعرف نفسك ..

جهاد : انا شبكتى مبتقطعش وبكم اسعد وبكم قلبي يطرب ..

الشرقاوى : يطرب اعوذ بالله طرب ومسخرة استغفر الله استغفر الله ..

جميع الاعضاء خلف الشرقاوى يهزون رؤوسهم ويستغفرون .. : استغفر الله استغفر الله ..

الشرقاوى صرخ : ليه يا اخ..

جهاد : صوباعي بيوجعني ..

الشرقاوى : وبيوجعك من ايه

جهاد : حد داس علية ..

الشرقاوى : مين اللي اتحرك وانا بقول كلميني انتي يا ملاك

ملاك وهي بتخبي صاروخ في حلة الشوربة: لا مش انا مش انا دى لولا ..

جهاد : لا مش هي اللي داست علي صوباعي ..

الشرقاوى : اومال مين ؟؟؟

جهاد بكل برود : دا الى بيمشي في الضلمة لانه ماشي في الضلمة
و مشافش صوباعي فداس عليه ..

الشرقاوى : نعم يااخويا مين هو اللي انت بتتكلم عليه ؟؟

ظاظا يهمس بأذن الشرقاوى : بيتكلم عن دراكولا

الشرقاوى : نعم ! يا روح ماما , دراكولا ايه وجيبلي كولا ايه انا مش مؤمن بالخرافات دي ..

فجأه النور ينقطع ..

الشرقاوى : يصرخ الحقوني الحقوني ..

الكل في صوت واحد مالك يا شرقاوى

الشرقاوى وهو يرتعد خوفا: الى بيمشي في الضلمة داس علي صوباعي ..

الكل يهمس : ياريتها رقبتك

و بعدها رجع النور و الكل كان على اخرة قاموا من غير
حتى ما يشوفوا الاكل

___________________________

المشهد الأول : جنينة الفيلا الكبيره ..
الزمان : مساء..

لولا و سمبو
قاعدين بيلعبوا شطرانج .. وفجأه مسكوا في خناق بعض ..

طارق : في ايه يجدعان بتتخانقوا ليه ؟؟؟

لولا : سمبو موتيلي الملك ..

سمبو : لاهي اللي ابتدت وسممتلى البهايم بتاعتي ..

لولا : ياسلام!! انتي اللي بتغش,وبتحرك القطع وبتسرقيني..

سمبو : انا اللي بغش ليه بقي هو انا مش قولتلك علشان تحرك الحصان لازم تأكليه برسيم الاول ؟؟؟

لولا : لا دي اصول لعب زي ماالاصول بتقول ان الوزير لازم ياخد اذن من الملك قبل مايتحرك خطوة واحدة..

سمبو : انتي كدابه..

لولا : وانت نصاب..

ومسكوا في خناق بعض تاني

طارق وهو بيسلك بينهم: خلاص خلاص لاانتى كدابه ولاانت نصاب متلعبوش مع بعض تاني ..

فجأه يخش ماكس هو بيجري : ياجماعة ياجماعة شوفتوا حسن بيعمل اية

سمبو و لولا و طارق : بيعمل ايه بيعمل ايه ؟؟؟

طارق : هيكون بيعمل إيه إخلص وقول ..

ماكس : والله مش عارف ابدأ منين أنا بالصدفة معدى على غرفته لقيته ..

لولا : ما تنطق يا إبنى سيبت ركبنا

ماكس : لقيته واقف قدام المراية و حاطط جنبة طربوش

وعمال يقول : بقا يا ربى شعرى كله يقع وأنا لسا صغير كده ..

سمبو : قصدك تقول إن حسن كان هيلبس الطربوش عشان شعره وقع

ماكس : ممكن بس أنا مستغرب ما الكاسكيتات مالية البلد لازم يعنى الطربوش ..

ويضحك الجميع

لحد ما جه الشرقاوى ويامــر الجميع بالنوم إستعداداً للعريس
اللى هييجى يطلب إيد إحدى بنات المنتدى

المنتدى فى صوت واحد : عريس ؟؟

الشرقاوى : ايوة عريس و هييجى بكرة و معرفش اكتر من كدا

طلع الجميع لاوضهم

بارتيز : تفتكروا عريس اية دا ؟؟

طاهر : يا عم بيشتغلنا

على : ممكن يكون بجد

السفرى : مين معانا هتتجوز ؟؟

السرس : ربنا يبارك لنا و هيعملوا فرح و هنرقص

ماكس : ربنا يهديك كل الى يهمك الفرفشة

و نام الاعضاء فى الغموض الفظيع دا

____________________________

اليوم التالى ..

المشهد الأول

نهار خارجى

شارع طويل وفى نهايته البيت الكبير ومن خارج أسواره نرى سيارة متوسطة الحجم تقف وينزل منها شاباً يرتدى بدلة كحلية اللون يمد يده داخل السيارة ويمسك بلفافة أنيقة من الحلويات

الأب : ده بيت كبير أوى يا ياابنى

الشاب : أيوة يا بابا أصلهم عددهم كبير أوى هى وإخواتها دول حوالى 100 ولد و بنت

الأب : يالله ودول جابوهم إزاى دول ؟

الأم : جابوهم فى كام سنة دول ياابنى ؟

الشاب : والله يا ماما أنا كل شوية تطلع تقولى إكتشفنا أخ جديد كان فى منتدى
دردشــة شغال هناك

الاب : ودول يا ابنى هانعزمهم إزاى فى حفلة الخطوبة ؟؟؟

الشاب وقد وصل ناحية البوابة ويطرق الجرس : اللمة حلوة يا بابا

المشهد التانى

ظاظا يفتح الباب ويقول : هييييييه العريس جه العريس جه وجايب حلويات كمان

زهرة :
يابنى انتا اتهد انتا مش لسه مخصوملك مصروف أسبوعين من مصروف الشهر ده
وأول امبارح اتخصملك مصروف شهر من مصروف السنة دى ولا الشهر اللى فات
مخصوملك مصروف سنة من مصروف القرن اللى إحنا فيه ؟

ظاظا ونسى إنه لسه موقف العريس عالباب : وإنتا مالك اٍنتي ياختي اتشطري كده
و إطلعي الأول زيى بدل ماإنتي بقالك خمس سنين فى ثانويــة عامة

طاهر : ييجى على صوت الخناقة : إيه يابنى إنتا وهي سايبين الناس عالباب وواقفين تتخانقوا يشير للضيوف : إتفضلوا ويشير إليهم مصطحبهم إلى غرفة الصالون

ياتري مين هي العروسه وايه اللي حصل للعريس

_______________________

فاصل قصير و نواصل

عدنا م الفاصل القصير

المشهد الأول..

ابوشادى : جالساً فى الحجرة ومن حوله مجموعة من رجال المنتدى يقف محيياً الضيوف

ويشير ل الليثى إشارة معناها ظاظا و زهرة فى اوضة الفيران

الشاب : السلام عليكم ورحمة الله وبركاته

الجميع فى صوت واحد جهورى : وعليكم السلام ورحمة الله وبركاته

الشاب مرتعباً من ضخامة الصوت موجهاً كلامه : طبعاً يا عمي ريم كلمتنى عن حضرتك كتير وكان نفسى فعلاً تيجى الفرصة اللى أتعرف فيها بحضرتك
والحمد لله أهوه جه الوقت اللى أتشرف فيه واجى أقعد مع حضرتك

ابوشادى : ياابنى هذا شرف لا ادعيه وأزكى على الله أحد ونعوذ بالله
من شرور أنفسنا وسيئات أعمالنا إنه من يهده الله فلا مضل له ومن يضله
فلن تجد له هادياً أبداً ،إخوتى فى الله .......

الشرقاوى : يا حج النهاردة التلات مش الجمعة إنتا طلعت عالمنبر بدرى

ابوشادى وموجهاً كلامه لوالد الشاب : بقى حضرتك قلتى إنك شغال فى وزارة التربية والتعليم على كده تعرف محسن بيه عبد القادر ؟

والد الشاب : لاوالله مااتشرفتش حضرتك ياترى كان موقعه إيه فى الوزارة

ابوشادى و زى ميكون اتفأجئ بالسؤال : مش عارف انا فاكر إنه كان حاجة كبيرة
كده أوى هناك المهم ماعلينا

والد الشاب : انا إبنى ماشاء الله عليه إتخرج من حوالى تلات سنين من كلية الهندسة جامعة الزقازيق فرع بنها

بارتيز : أيوة ياعمى دى فى شبرا عندنا دى جنب مدرسة ناصر الثانوية بنات انا كنت اعرف أصحاب ليا هناك زمان أصلى كنت بعدى عليها لما كنت بروح أجيب البنت صاحبتى
من المدرسة وأنا فى أولى كلية ...
ال يعنى مقطع السمكة وديلها

والد الشاب يكمل كلامه مبتسماً : اهوه طلعنا معرفة قديمة وأنا يسعدنى ويشرفنى اطلب إيد بنتكم ريم لإبنى .

ابوشادى : وأنا بقول الولد إبنك والبنت بنتك بس برضه لازم تسيبلى يومين اخد رأى البنت إنتا عارف إن الشرع فرض الأخذ بالرأى فى الزواج أينعم لا زواج لقاصر إلا بوكيل والزواج من العبادات والحماية للفتى قبل الفتاة فى زمن عز علينا أن نرى فيه شبابنا وقد عانوا الأمرين من متطلبات الزواج الضرورية ...... ويستمر فى كلامه

المشهد الثاني

غرفة البنات و فيها كل بنات المنتدى ويظهر فى الكادر بنوتة واقفة بجوار ريم

بنوتة : نا قلتلك بلاش كوافير وأنا أظبطلك شعرك شوفى انا اللى عاملة شعر لولا

ريم بتبص للولا وقد إصطبغ شعرها بلون غير معروف فى الأوساط الكيمائية ويظهر وكأنه تم ضربه فى الخلاط
( شعرها طبعاً مش اللون ) وتحمد ربها فى سرها ان ألهمها الذهاب إلى الكوافير بدلاً من الوقوع فى مقالب اخواتها

ريم : معلش يا ستى المرة اللى جاية

ملاك : إمسكى يا بنوتة أنا سرقت شوية كركاديه من أودة الخزين وطحنتهم
خدى حطى لريم منهم

زهرة : أيوة أنا قريت فى مجلة روسية إن الكركاديه مفيد جداً فى الخطوبة
خصوصاً لو كان مسروق .. ال يعنى مثقفة

لولا عمالة تشاور لزهرة : وانا يا زهرة أول مش هاتحطيلى ميك آب إنتى وعدتينى إمبارح وأنا سمعت كلامك وماجبتش سيرة لحد إنك بتهربى البطاطس وتبعيها لعم عبده اللى عامل عربية كبدة على ناصية الشارع .

__________________________________

زهرة تسيبهم فى عملية تزويق ريم وتنزل على المطبخ تشوف هاتقدم إيه للضيوف : ياعينى عليا أنا الى مظلومة دايماً هما يقعدوا يتزوقوا وأنا الى أشوف المطبخ وسنين المطبخ

تفاجأ بأقفاص الفيران متكسرة ومافيش ولا فار فى القفص بتاعه
ترقع بالصوت الحقووووووووونى وتجرى على بنت النيل :

إلحقينى يا أختى أقفاص الفيران كلها متعضعضة
ومافيش ولا فار محترم نفسيته وقاعد فى القفص بتاعه
ولا كراتين الضفاضيع كلها مقلوبة على ضهورها والضفاضيع كلها هربان
ة وصفايح الصراصير المخلية مافيهاش صرصار يوحد ربك أنا قلقانة
يا بنوتة لأحسن يكون حد سرقهم

بنوتة : طيب أنا هاشوف الموضوع ده بس يلا شهلى إنتى كمان
لاحسن ابوشادى إستعجل المشاريب ومالقاهاش هايخرب بيتك ويكب زيتك

المشهدالخامس

بنوتة,لولا,ملاك و زهرة يلاقوا الرجالة كلها راكبة على نفس العريس وكل واحد بسؤال

السفرى و السرس و على : وانت فى المرحلة الجامعية هل كنت تتبع
أي تيار فكرى أو سياسى أو ثقافى وإذا لم تكن

هل عملت مرشداً لمباحث أمن الدولة ؟

العريس مذهول و لسة جاى يفتح فمه عشان يعترض

يلحقة بارتيز : ياترى تقدر تقولى الفرق بين شعر نزار قبانى وشعر زكى جمعة ؟

ظاظا : نتا بتشجع نادى إيه ؟

حسن : تعرف اية عن المصارعة

الليثى : حافظ أد إيه من القرآن ؟

ماكس : اية رايك فى الفنش بتاع اندرتيكر امبارح

____________________________

العريس خلاص كان هينفجر من كتر الاسالة الى علية

و نيجى عند والد العريس الى ابوشادى مسبلوش اى مساحى للكلام

و لولا واقفة و هتموت من الضحك و تغمز لبنوتة : لحقي ياستي ابوشادى ماسك الميكرفون من صباحية ربنا ومش مدى الراجل فرصة إنه يتكلم
ده تقريبا بيقول كل الكلام بتاعه وكمان بيزود عليه
وهو اللى بيقول الكلام اللى المفروض إن الراجل يقوله
والراجل ياعينى مسلم خالص زى مايكون قاله إتفضل ودانى اهى خد اتعامل انتا بيها

ينفجر الإثنان من الضحك

بنوتة : بقولك إيه أنا عاوزه أزوغ من هنا تفتكري ابوشادى هاياخد باله إنى مش موجوده

لولا : ياستي طنشي ياخد باله من مين بس داإحنا ماشاء الله علينا كتيرده على ماييجى يعدنا نافاااار نافااااار هايحتاج تلات ساعات على مايخلصنا كلنا انا كمان هاطلع أعمل تليفون فى السريع كده

بنوتة : اموت فيكي إنتي يا بتاعه المقالب حاجة جديدة دى يابت ؟؟

لولا : بقى ماسكة ودان والدة الشاب وهات يا رغى من هنا لبعد بكرة : لا بقى إنتى تلاقيكى مادوقتهاش بالحبهان والمستكة والزعفران حاجة كده زى العسل ألا صحيح قوليلى جربتى تعمل شوربة ضفاضيع مع طبق صراصير بيضا بانيه ولا إسكالوب السحالى هابقى أكتبلك الوصفة

ملاك تميل على زهرة وتقولها : شايفة طبق الحلويات اللى جايبه ..

زهرة : يا ريته كان جاب تمر ده التمر ده سنة عن النبى عليه الصلاة والسلام وبعدين إنتى متخيلة إن فيه محل حلويات فى البلد دى هايكفى العيال دى
داإحنا لو جبنالهم مصنع حلويات العبد كله هاياكلوه ويقولوا كماااااااااااااااان

فجأة ينتبه الجميع على دخول ريم شايلة صنية الشربات وتسلم على العريس
ومافيش مانع إنها تدلق عليه كوباية الشربات الفراوله
والبدلة طبعا كحلى وبقى عليها بقعة حمرا أد كده بس الموضوع عادى عادى

وبدأ ابوشادى يتكلم : بص بقى حضرتك عملية المقابلات دى
فى المناسبات القومية بس يعنى فى عيد العمال و يوم الفلاح وعيد الجلاء
وطبعاً لو حب يخرج معاها يفسحها مش هايكونوا لوحدهم لازم يكون معاهم
محرم كده حوالى 12 أخ من إخواتها إتفقنا

والد الشاب وهو يتحسر على مستقبل إبنه الغارق : موافقين

ابوشادى : على بركة الله نقرا بقى الفاتحـــه

فى نص الفاتحه تنقطع الكهربا ويحدث هرج ومرج
وامسك واللي بيقول اهو لقيته فى جو الكهربا المقطوعة
والفيران والصراصير الهربانة

وبعد رجوع الكهرباء.

ينادي ابوشادى!!: فين العريس يابني

ويضحك الجميع في صوت واحد ده هـرب يا حج

هههههههههههههههههههههههههههههه
عنده حق وربنا العريس يهرب هههههههههههههههههههههههه

__________________________________

انتظرونــــا الحلقة القــــادمة

و شوفوا الاحداث الجديدة

جامده كيييييييييييييييييييييييييييييييييييييك
والله حلوة وشكرا ليييييييييييييييييييييييييييييييك

تسلم على الرد يا ظاظا

يا جماعة

كتر الردود بتشجعنى انى اكمل و ابدع

عايز اشوف ردود كتير

و تشجيع من اصحابى اكتر

إشطه عليك يابارتيز
وإن شاء الله المسلسل حيتكمل

اشطه عليك يا بارتيز

كمل يا معلم

هههههههههههههه

وانا

مفيش عروسه ليا
انا خلاص هعنس